Maqedoni, 3 gusht 2014 – Një tragjedi e rëndë familjare ka ndodhur në Tetovë, në familjen Memeti të lagjes së Çarshisë së Epërme.
Kryefamiljari Memeti është dashur të përcjellë vajzën e tij 23 vjeçare Arjetën, për nuse. Por, ai sot e ka përcjellë për në banesën e fundit, pasi vajza e re nuk ka arritur të veshë fustanin e bardhe të nusërisë.
Arjeta u nda nga jeta në orët e para të mëngjesit të ditës së sotme, për shkak të një ataku në zemër.
E gjithë ceremonia e dasmës ishte bërë gati, ndërsa dhëndri nga fshati Dobrosht i Tetovës ishte përgatitur që ta merrte nuse Arjetën.
Mirëpo, kjo nuk u bë dot e mundur, pasi Arjeta ndërroi jetë dhe u varros pikërisht sot në varrezat e qytetit.
/agjencia e lajmeve “Dyrrah”/
