Tiranë, 25 korrik 2014 – Pesë deputetë të mazhorancës, Tom Doshi, Armando Prenga, Pjerin Ndreu, Parid Cara dhe Mark Frroku, braktisën Kuvendin kur duhej të votohej për ligjet me shumicë të cilësuar. I pyetur nga mediat, deputeti Tom Doshi, që duket se po udhëheq këtë grup, tha se ata ishin duke festuar ditëlindjen e deputetit Mark Frroku. Por Frroku e ka ditëlindjen në tetor, shkruan gazeta "Dita". Madje me një kërkim të thjeshtë në jetëshkrimin e deputetëve të del që jo vetëm Frroku, po asnjë prej këtyre deputetëve nuk e ka ditëlindjen në muajin korrik.
Mark Frroku ka lindur më 6 tetor
Pjerin Ndreu ka lindur më 12 dhjetor
Tom Doshi ka lindur më 6 qershor
Armando Prenga ka lindur më 26 qershor
Parid Cara ka lindur më 11 shtator
****
Mungesa në seancë, Doshi: Nuk po i bëjmë presion kryeministrit, festuam ditëlindjen e Frrokut
Deputeti socialist, Tom Doshi, ka justifikuar mungesën e tij dhe të disa kolegëve të tjerë, gjatë votimit për projektligjin e KLD-së.
Doshi ka thënë se ata janë larguar për të festuar ditëlindjen e Mark Frrokut.
Sipas Doshit, ata nuk po i bëjnë presion kryeministrit Edi Rama.
“Ishim në ditëlindjen e Mark Frrokut, ndaj u larguam nga seanca.
Nuk po i bëjmë presion kryeministrit.
Unë kundërshtimet e mia i kam paraqitur në Komisionin e Ligjeve.
Nuk do votoj për ato projektligje që i kam kritikuar publikisht”, ka thënë Doshi për Neës 24.
Çudia është përse ata kanë festuar pikërisht në kohën kur në Kuvend duhej vota e tyre!
/gazeta "Dita"/
