TIRANE,14 tetor 2013  – Drejtori i ri i Institutit të Shëndetit Publik, Arjan Bregu, u prezantua sot para administratës dhe punonjësve të institucionit nga Ministri i Shëndetësisë, Ilir Beqaj. Në fjalën e tij gjatë prezantimit të kreut të ri të ISHP-së, Ministri i Shëndetësisë tha midis të tjerash, se "jemi të bindur që Dr. Arjan Bregu, me përvojën e tij profesionale dhe njerëzore do të dijë të zbatojë programin e qeverisë së re për shëndetin publik." 
“Dr. Bregu vjen në këtë detyrë pas një përvoje të rëndësishme profesionale në drejtimin e sektorit të Higjienës dhe Epidemiologjisë në Drejtorinë e Shëndetit Publik të Ministrisë së Shëndetësisë dhe detyra të tjera menaxheriale, si dhe ato të kërkimit shkencor”-, vazhdoi më tej Ministri, duke shprehur bindjen se kjo përvojë do ta ndihmojë atë në drejtimin e këtij institucioni të rëndësishëm të sistemit të kujdesit shëndetësor në vend. 
Drejtori i ri i ISHP-së, Bregu, në fjalën e tij, falënderoi Ministrin e Shëndetësisë për besimin, duke nënvizuar gatishmërinë dhe angazhimin e tij për të qenë në lartësinë e detyrave që kërkohen nga programi qeverisës të "Shqipërisë së Gjeneratës Tjetër". 
Ministri Beqaj theksoi se “ISHP duhet të jetë aktori kryesor në hartimin dhe përditësimin e një sistemi unik kombëtar të informacionit shëndetësor, ku ky institucion duhet të jetë institucioni përgjegjës për hartimin dhe mirëmbajtjen e regjistrave kombëtarë, përfshi regjistrin e sëmundjeve tumorale, atyre kardiovaskulare, diabetit, frymëmarrjes.” 
ISHP duhet të jetë aktori kryesor në hartimin dhe përditësimin e një sistemi unik kombëtar të informacionit shëndetësor dhe ky institucion duhet të fillojë së prodhuari raporte shëndetësore vjetore, një standard i munguar prej kohësh në traditën e këtij institucioni. “Me emërimin e z. Arjan Bregu në krye të ISHP-së, jemi të bindur se do t'i përgjigjemi sfidave me të cilat përballet sot sistemi i kujdesit shëndetësor”, tha Ministri i Shëndetësisë.