ITALI,2 shtator 2013 – Selia e Shenjtë në Vatikan, parashikon një luftë të III Botërore, nëse Shtetet e Bashkuara të Amerikës dhe ndërkombëtarët vendosin për ndërhyrje të armatosur në Siri. Deklarata e Vatikanit vjen pas tensionit dhe zhvillimeve të fundit, ndërkohë që presidenti Obama pret “OK” nga Kongresi Amerikan për ndërhyrje. 

Papa Françesku u lut të dielën në Romë për armëpushim, ndërsa ftoi bashkësinë ndërkombëtare për të gjetur një zgjidhje përmes dialogut, e jo luftës. 
Presidenti amerikan Barak Obama do të takohet sot në Shtëpinë e Bardhë me anëtarë të Kongresit për të paraqitur argumentat e tij për sulm ushtarak kundër Sirisë. Obama tha se do të presë për miratim nga Kongresi para se të merret vendimi përfundimtar. Një zë i fuqishëm për veprim kundër Sirisë, Senatori republikan John McCain tha për rrjetin CBS dje se goditja vetëm me disa raketa është thjesht një gjest simbolik. Ai tha se Presidenti duhet të hartojë një plan për Sirinë që përfshin një kërcënim për të çliruar vendin nga Bashar al-Assadi.


/BalkanWeb/