Tre “killera” me pagesë janë arrestuar nga policia e Durrësit, në fshatin Metallaj të Maminasit, në tentativë për t’i shpëtuar policisë. Të arrestuar janë Gazmend Dervishi 38 vjeç, banues në Shkozet, dhe Bruno Shehu 31 vjeç, banues në Durrës, të skeduar nga policia si të dënuar për drogë në Itali, ndërsa i treti, Dritan Nikolli 38 vjeç, banues në Sukth, si anëtar i bandës së Ilir Xhakjes, i dënuar për vrasje në vitin 1994, të një shtetasi me mbiemër Çyrbja në Shijak. Nikolli rezulton i dënuar për trafik droge në shtetin italian, dhe pasi ka përfunduar dënimin ka jetuar në Shqipëri.
Tre shtetasit e mësipërm janë ndaluar pas informacioneve të marra në rrugë operative, se ishin përgatitur për një ngjarje të rëndë kriminale. Në afërsi të autostradës Durrës-Tiranë në Maminas, nga policia e Shijakut u është bërë me shenjë të ndalojnë, por mjeti nuk ka ndaluar. Më pas në ndjekje të tyre janë vënë uniformat blu të Shijakut e të Durrësit, ndërsa më vonë erdhën edhe përforcime nga Tirana. Policia bëri me dije se në afërsi të Fabrikës së Tullave në Maminas, identifikuan mjetin tip “Benz”, me xhama të zinj, me targa gjermane HTB564, me drejtues shtetasin Gazmend Dervishi dhe pasagjerë shtetasit Dritan Nikolla dhe Bruno Shehu. Efektivët e Policisë i kanë bërë me shenjë të ndalojnë, por drejtuesi i mjetit është larguar me shpejtësi. Efektivët e Policisë e kanë ndjekur për rreth 30 minuta deri sa kanë bërë të mundur bllokimin e automjetit dhe të personave që ndodheshin në mjet.
Burimet pohojnë se të tre personat janë arrestuar nga policia e Durrësit, si të dyshuar të një vrasjeje në zonën e Maminasit. Në automjetin me të cilin udhëtonin tre të rinjtë janë gjetur armë zjarri, kapuça, maska dhe një bidon benzinë, që sipas hetuesve do të shërbente pas krimit për të djegur automjetin me të cilin lëviznin.
Hetimet:
Hetuesit bënë me dije se parandalimi i krimit vjen pas një sërë krimesh të ndodhura në trekëndëshin Spanjë-Itali-Holandë, ku operojnë dy grupe kriminale nga zona e Shijakut, konkurrente me njëra-tjetrën. “Kemi hapur një dosje të vjetër, dhe na rezulton se midis dy bandave konkurrente gjatë viteve, me aktivitet kryesisht jashtë vendit, kanë ndodhur shumë vrasje dhe tentativa vrasjesh. Më e fundit midis tyre ka ndodhur në Holandë, ku është vrarë një anëtar i një prej bandave. Dyshojmë që për shenjë hakmarrjeje është porositur vrasja e djeshme, nga tre të rinjtë e arrestuar. Në Shqipëri, këto dy banda takoheshin vetëm për larje hesapesh, por janë dy prej bandave më të rrezikshme që operojnë në trafikun e drogave të forta”, pohuan burime zyrtare nga grupi hetimor.
Të njëjtat burime konfirmojnë se ndërmjet dy grupeve rivale në zonën e Shijakut, që zhvillojnë aktivitet në Spanjë- Itali-Holandë, kanë konflikte të hapura me njëra-tjetrën, kryesisht për të fituar terren. Shtetasit e mësipërm, janë eksponentë me rrezikshmëri të lartë kriminale, me precedentë penalë të mëparshëm, në fushën e veprave penale kundër personit dhe trafikimit të lëndëve narkotike.
Në thelb është një konflikt midis dy grupeve kriminale për prishje të pazareve në fushën e lëndëve narkotike dhe lidhet më një tentative vrasje midis tyre.
Shtetasit e mësipërm, kishin planifikuar që pasi të kryenin aktin kriminal do të digjnin makinën dhe do të largoheshin me një automjet tjetër. Drejtoria e Policisë Durrës, nuk jep më shumë detaje mbi objektin e sulmit dhe personat e përfshirë për arsye hetimi. Materialet i kaluan Prokurorisë së Rrethit Gjyqësor Durrës për veprime të mëtejshme për veprën penale “Vrasja e mbetur në tentativë”.
Policia:
Gjatë kontrollit të ushtruar në automjetin tip “Benz” dhe në banesat e shtetasve të mësipërm, iu gjetën dhe iu sekuestruan në cilësinë e provave materiale:
• një armë zjarri tip automatik model 56;
• një pistoletë me mulli, kalibër 38;
• dy krehëra me 60 fishekë;
• automjeti tip Benz me targa gjermane HTB564;
• dy kapuça- maskë;
• tre palë doreza;
• dy shishe benzinë 1.5.litra;
• 2 celularë.
K.H.
