Pas miratimit në parim të buxhetit për vitin 2016, fondacioni Save the Children ngre shqetësimin se fondi i vënë në dispozicion për fëmijët është disa herë më i ulët sesa një vit më parë. Ndër sektorët që sipas tyre pësojnë më shumë reduktim është programi i kujdesit shëndetësor parësor, të cilin qeveria e ka miratuar buxhetin pa u konsulutar më herët me grupet e interesit.
Fondet e përcaktuara për fëmijët në buxhetin e 2016 janë shumë herë më të ulëta se ato të një viti më parë.
Kjo ka bërë që Fondacioni Save the Children të dalë me një qëndrim kritik për mënyrën sesi ky projektbuxhet është miratuar, sipas tyre në kundërshtim me ligjin pasi nuk është konsultuar më herët me grupet e interesit.
Ka një ulje të buxhetit për vitin që vjen 7.17%, e cila ne na shqetëson. Kuptohet që jemi në një periudhë krize, ka ulje të përgjithshme të kontributit”, ëshë shprehur drejtoresha e organizatës, Anila Meço.
Pas përfundimit të studimit për rritjen e investimeve publike për realizimin e të drejtave të fëmijëve në Shqipëri, fondacioni Save the Children ka dalë me disa rekomandime për qeverinë.
“Kanë një detyrë të rëndësishme të investojnë tek e ardhmja. E vetmja mënyrë për tu bërë kjo është që të shikojnë dhe të përmbushin standartet ndërkombëtare tek investimi që bëjnë për fëmijët”, tha Anila Meço:
Sipas fondacionit Save the Children, buxheti për Shëndetësinë si fondet për programin e kujdesit shëndetësor parësor, apo shpenzimet për fëmijët në institucione apo forma alternative të dënimit duhet të rishikohen.
