PRESHEVE, 12 mars 2013 – Deputeti i vetëm shqiptar nga Lugina e Preshevës në Kuvendin e Serbisë, Riza Halimi, ka thënë se platforma e aprovuar të shtunën nga Kuvendi shqiptaro-shqiptar, parasheh zgjidhjen urgjente të problemeve të qytetarëve në Luginë.
Sipas tij, kjo platformë parasheh që shqiptarët në Preshevë, Medvegjë e Bujanoc të jenë faktorë vendimmarrës në gjykata, polici, arsim etj. Në një intervistë për të përditshmen kosovare “Tribuna”, Halimi ka kërkuar reciprocitet të të drejtave të shqiptarëve të Luginës, në raport me ato të serbëve në Kosovë.
Si kryetar i Partisë për Veprim Demokratik në Preshevë, ai tërheq vërejtjen se mund të krijohen tensione, nëse arrihet ndonjë marrëveshje ndërmjet Kosovës dhe Serbisë, e cila nuk parasheh të drejta të barabarta ndërmjet serbëve në veri dhe shqiptarëve në Luginë.
