18 gusht 2015 – Qeveria shqiptare ka identifikuar zonën Tiranë-Durrës si një ndër hapësirat më të rëndësishme ekonomike për vendin si dhe në Ballkan. Për të garantuar një zhvillim të qëndrueshëm, territorial dhe urban të kësaj zone, Ministria e Zhvillimit Urban në bashkëpunim me Agjencinë Kombëtare të Planifikimit të Territorit kanë ndërmarrë nismën për hartimin e planit të integruar ndërsektorial (PIN) për zonën ekonomike Tiranë-Durrës. Duke parë kompleksitetin ekonomik të zhvillimit dhe morfologjisë së territorit dhe për t’iu përgjigjur sfidave e harmonizuar veprimet, plani është përcaktuar si ndërsektorial dhe i integruar.
Rajoni Durrës-Tiranë është nyja kryesore e ndërveprimit të burimeve njerëzore, mallrave dhe hapësirave të jetueshme të veriut dhe jugut të Shqipërisë si dhe porta hyrëse e “Korridorit 8”. Ndikim të drejtpërdrejtë në ekonominë e rajonit luajnë dhe portat logjistike të pozicionuara në të: porti i Durrësit dhe aeroporti “Nënë Tereza”, parqet logjistike dhe parqet energjetike Spitallë, parku logjistik Laknas.
Rajoni “Durrës-Tiranë” është kontribuesi kryesor i zhvillimit ekonomik në rang kombëtar, si në numër biznesesh po njësoj dhe në shumëllojshmërinë e tyre, kjo falë prezencës së lartë në numër të institucioneve dhe numrit të lartë të dendësisë së banorëve në rajon si dhe pozicionimit të favorshëm gjeografik. Numri i bizneseve në rajon është 53 640 njësi (INSTAT 2012 ). Ky numër është i përbërë nga bizneset e Durrësit dhe Tiranës. Në nivel kombëtar ato përfaqësohen me 38.7 për qind Tirana dhe 11.8 për qind Durrës. Shoqëritë aksionare të rajonit ne raport me nivelin kombëtar janë: Tirana me 626 shoqëri ose 49.2 për qind. Durrësi me 100 shoqëri ose 7.9 për qind. Përqendrimi i kapitalit të shoqërive aksionare në nivel vendor është 76.4 për qind në Tiranë dhe 3.7 për qind në Durrës.
Përqendrimi i bizneseve në rajon është kryesisht i fokusuar në këto zona funksionale: Tiranë, Tiranë-Vorë, Tiranë-Kamëz. Durrës-Shkozet, Durrës-Shijak-Xhafzotaj. Shijak-Xhafzotaj-Sukth. Zonat funksionale sekondare: Kamëz-Nikël, Kamëz-Paskuqan, Kashar-Tiranë, Vorë-Bërxull-Marqinet-Maminas, Shijak-Manëz. Sektorët ndërveprues në rajon: shërbime-rekreacion, ndërtim, industri, turizëm.
Burimi (hartat dhe informacionet): AKPT
/red. th. m. agjencia e lajmeve “Dyrrah”/
