Vetëm pak ka zgjatur arratia e autorit të plagosjes së shtetasit Bledar Troshani mbrëmjen e sotme në qendër të Shkodrës.
Policia njofton se në pranga është vendosur shtetasi me iniciale Z.Sh. banues në lagjen “Kongresi i Përmetit” në qytetin verior.
Blutë e Shkodrës nuk japin më tepër informacione mbi rrethanat dhe shkaqet e konfliktit që përfundoi në plagosjen me thikë të Bledar Troshanit.
Pas plagosjes, 44-vjeçari Troshani është dërguar në spital ku ndodhet në gjendje të rëndë shëndetësore.
Njoftimi i policisë:
Shkodër-Plagosi me mjet prerës (thikë) një 44-vjeçar, kapet menjëherë dhe shoqërohet në Komisariat, autori i dyshuar.
Rreth orës 18:15, në lagjen “Qemal Stafa”, shtetasi Z. Sh., ka plagosur me mjet prerës (thikë), shtetasin B. T., 44 vjeç, të dy banues në lagjen “Kongresi i Përmetit”.
Falë veprimeve të shpejta policore, është bërë e mundur kapja e menjëhershme dhe shoqërimi në ambientet e Komisariatit të Policisë Shkodër, i shtetasit Z. Sh., me qëllim kryerjen e veprimeve të mëtejshme procedurale.
Grupi hetimor vijon punën për zbardhjen e plotë të rrethanave të kësaj ngjarjeje.
