Si çdo gjë, sytë dhe vizioni ndjekin një rrugë të konsumimit gradual me kalimin e kohës dhe me kalimin e moshës së trupit. Është rrjedha e natyrshme e gjërave. Por përtej konsumit normal, hulumtimi i ri zbulon se ka faktorë të tjerë që ndikojnë në aftësinë për të parë dhe sa shpejt konsumohet. Një nga këta faktorë, sipas studiuesve nga Universiteti i Torontos, është temperatura e ambientit . Përfundimet e reja shkencore janë publikuar në Ophthalmic Epidemiology.
Në veçanti, njerëzit që jetojnë në klimat më të ngrohta duket se përballen me një rrezik në rritje të sëmundjeve të syve në krahasim me ata që jetojnë në klimat më të ftohta. Gjetjet e hulumtimit u bazuan në 6 studime të njëpasnjëshme të Anketës së Komunitetit Amerikan (2012-2017) që studiojnë një kampion përfaqësues kombëtar të të anketuarve amerikanë të moshës 65 vjeç e lart në baza vjetore. Studiuesit përdorën një mostër prej 1.7 milionë të rriturish dhe të dhëna të temperaturës mesatare nga Administrata Kombëtare Oqeanike dhe Atmosferike dhe të dhëna shtesë nga Anketa e Komunitetit Amerikan.
Nga analiza e të dhënave rezultoi se:
- Ata që jetonin në zona me një temperaturë mesatare midis 10-12°C kishin 14% më shumë gjasa të zhvillonin një sëmundje serioze të syve.
- Ata që jetonin në zona ndërmjet 12-15°C përballeshin me një rrezik 24% në rritje dhe
- Banorët e zonave me një temperaturë mesatare prej 15,5°C ose më lart kishin 44% më shumë gjasa të përjetonin shikim të dobët gjatë viteve.
Lidhja e vëzhguar midis temperaturës mesatare dhe dëmtimit të rëndë të shikimit mbeti e fortë pavarësisht nga mosha, gjinia, të ardhurat dhe niveli arsimor i pjesëmarrësve. Për më tepër, lidhja midis temperaturës së lartë dhe problemeve të shikimit ishte më e fortë tek meshkujt dhe njerëzit e moshës 65-79 vjeç.
