Gjatë vizitës së tij në New York, ministri për Evropën dhe Punët e Jashtme, Igli Hasani, zhvilloi një takim me Sekretarin e Përgjithshëm të OKB, Antonio Guterres. Në fokus të takimit ishte puna e Shqipërisë gjatë mandatit të saj dy-vjeçar në Këshillin e Sigurimit si dhe përpjekjet për rigjallërimin e bashkëpunimit shumëpalësh.
Ministri Hasani e siguroi Sekretarin Guterres për angazhimin e Shqipërisë në mbrojtjen e të drejtave të njeriut, ruajtjen e ligjit ndërkombëtar, Kartën e OKB-së dhe garantimin e llogaridhënies.
Fundi i vitit 2023 shënon edhe përmbylljen e mandatit dy-vjeçar të Shqipërisë në Këshillin e Sigurimit të Kombeve të Bashkuara.
Gjatë kësaj periudhe dy-vjeçare vendi ynë me pjesëmarrjen aktive në punimet e Këshillit ka dëshmuar se i përket një aleance vlerash politiko-strategjike të konsoliduara prej vitesh, si një vend që ka bërë dhe vazhdon të japë një kontribut të qenësishëm për paqen dhe stabilitetin global, duke pasur si prioritet rajonin, kontinentin evropian e më gjerë.
