Deputeti demokrat, Oerd Bylykbashi, denoncoi në Kuvend aktin normativ për të marrë fonde nga buxheti për ndërtimin e portit të ri në Durrës.
Ai tha se këto janë para që do iu merren qytetarëve, ndërkohë që projekti mund të shkojë deri në 2 miliardë dollarë.
“400 milionë dollarë në tre vitet e ardhshme do u grabiten xhepave të shqiptarëve për të ndërtuar portin e ri në Porto Romano. Nga buxheti i shtetit, që do të thotë nga taksat e shqiptarëve.
Doli Rama në fillim e tha do e bëj investim publik, pastaj tha se do jetë me kredi. Në një moment tha se do e bëj me të ardhurat e portit. Ishte gënjeshtra tjetër. Për të ardhur tek ajo që ishte qëllimi.
400 milionë dollarë për një port, i cili nëse nuk do të kishte bërë kontratën hiperkorruptive, antikushtetuese, që ia dha një kompanie private me veshje arabe, ku janë të gjitha interesat korruptivë, nga kryeministri e poshtë, porti i Durrësit nuk kishte nevojë të ndërronte vend.
Të gjitha vlerësimet shkojnë nga 1.2 miliardë deri në 1.7 miliardë, ndoshta shkon edhe 2 miliardë porti i ri. Ndërkohë kemi një port që ekziston prej më shumë se 2700 vitesh dhe e zhdukim sot”, tha Bylykbashi.
