Gjykata e Lartë rrëzon Jorgo Goron, ish-kryebashkiaku i Himarës mbetet në burg

Gjykata e Lartë nuk ka pranuar rekursin e ish-Kryebashkiakut të Himarës, Jorgo Goro, i cili ndodhet në masë sigurie “arrest me burg” vendosur nga GJKKO, me kërkesë të SPAK. Goro akuzohet për tjetërsimin e pronave, përmes shpërdorimit të detyrës, por edhe fshehje pasurie.

Goro iu drejtua Gjykatës së Lartë me një kërkesë për të ndryshuar masën e sigurisë.

Gjykata e Lartë ka rrëzuar rekursin, duke lënë në fuqi këstu masën e sigurisë “arrest me burg” të vendosur më parë nga GJKKO dhe më pas Apeli i Gjykatës së Posaçme.

Pak ditë më parë, SPAK çoi për gjykim dosjen ndaj ish-Kryebashkiakut të Himarës Jorgo Goro dhe disa ish-vartësve të tij.

Referuar dosjes së SPAK, i pandehuri Jorgo Goro provohet të ketë shpërdoruar detyrën dy herë, lidhur me tjetërsimin e pronave, sikundër ka fshehur pasuritë e tij.

Nga hetimi penal, thuhet në njoftimin e SPAK, rezultoi plotësisht e provuar se në pasurinë e paluajtshme e llojit apartament, me sipërfaqe totale 81.41 m2, me adresë në Tiranë, aktualisht e regjistruar në pronësi të shtetasit G. S., i pandehuri Jorgo Goro është pronar faktik duke pasur mbi të, të drejta dhe interesa pasurore.

“Nga ana tjetër, referuar Deklaratave të Interesave Private të vitit 2020 dhe në vijim, përpiluar dhe nënshkruar nga i pandehuri Jorgo Goro, në cilësinë e subjektit të zgjedhur vendor, nuk ekziston asnjë gjurmë e deklarimit të interesave të tij apo familjarëve mbi këtë pasuri, shpenzime të mundshme për porositjen ose blerjen e tij, të drejta posedimi apo pronësie mbi të. Për këtë shkak, me kërkesë të Prokurorisë së Posaçme, pasuria në fjalë është vendosur nën sekuestro preventive në bazë të Vendimit Nr. 28 datë 31.07.2024, të Gjykatës së Posaçme të Apelit për Korrupsionin dhe Krimin e Organizuar”, thekson SPAK.
Gjithashtu në rastin e ish-Kryebashkiakut të Himarës dhe vartësve të tij, thuhet se nga hetimi penal rezultoi plotësisht i provuar fakti se të pandehurit, në bashkëpunim kanë konfirmuar një plan rilevimi me një vendndodhje gjeografike të pasurisë Nr. 36/341, krejtësisht të ndryshme nga ajo që i korrespondon dokumentacionit pronësor.

Madje kësaj pasurie, të pandehurit i kanë dhënë një numër të ri (36/35) të pabazuar në asnjë të dhënë fakti dhe krejtësisht në kapërcim të kompetencave që u njeh ligji. Ky plan rilevimi i konfirmuar nga të bashkëpandehurit ka shërbyer për të gjithë procedurën e zhvillimit të pronës deri në lëshimin e Lejes së Ndërtimit në emër të shoqërisë “AG.TÇ” sh.p.k.