Presidenti i PL-së, Ilir Meta përmes një postimi në rrjetet sociale shprehet se sezonin e ri universitar Qeveria e nis me një “dhuratë poshtëruese” duke bërë gati një ligj që poshtëron botën akademike dhe shkencore në vend.
Postimi i Metës:
Sezonin e ri universitar Qeveria e nis me një “dhuratë poshtëruese” duke bërë gati një ligj që poshtëron botën akademike dhe shkencore në vend.
Në krye të shkencës do të jetë vetë ai që shkatërroi çdo institucion kërkimor dhe shkencor, që shkatërroi lirinë akademike dhe autonominë universitare, që bën fushata intimiduese ndaj pedagogëve që kërkojnë të drejtat e tyre, që e ka çuar nivelin e buxhetimit për Arsimin më pak se gjysma e vendeve fqinje, që e rriti analfabetizmin funksional dhe ka gati zero fonde për kërkimin shkencor.
Kjo shkresë tregon edhe fyerjen ndaj mendimeve të Konferencës të Rektorëve, mendimi i të cilëve kërkohet vetëm për formalitet.
Për Partinë e Lirisë, Arsimi dhe investimi në Kapitalin Njerëzor, është një nga 5 Prioritetet tona madhore.
Partia e Lirisë angazhohet në programin e saj konkret për dyfishimin e nivelit të buxhetimit për Arsimin dhe Inovacionin, për të kaluar mbi mesataren e vendeve të Bashkimit Europian dhe vendeve të rajonit.
Investimi në Arsim dhe Kërkim Shkencor do të jetë në nivelin 5% të PBB.
Mësuesia do të konsiderohet degë prioritare dhe do të shoqërohet me mbështetje financiare për studentët dhe mësuesit.
Do të trajtohen me investime prioritare degët e teknologjisë dhe informacionit.
Vetëm kështu përgatisim një fuqi të kualifikuar njerëzore për ta kthyer Shqipërinë në fuqi eksportuese.
