Një gjykatë ruse ka dënuar sot tetë persona me burgim të përjetshëm për përfshirjen e tyre në shpërthimin gjigant që shkatërroi pjesërisht në vitin 2022, një urë ikonike që lidhte Rusinë me gadishullin e Krimesë, të cilin Moska e aneksoi në vitin 2014. Në fund të seancës dëgjimore të mbajtur në Rostov-mbi-Don, në Rusinë jugore, tetë të pandehurit u shpallën fajtorë për përkatësi në një grup të organizuar kriminal që synonte të kryente një sulm në urën e Krimesë, i cili mori jetën e pesë personave në tetor 2022.
Mediat e huaja shkruajnë se disa kohë më vonë Kievi mori përgjegjësinë për shpërthimin, i cili ndodhi tetë muaj pasi forcat ruse pushtuan Ukrainën. Ura rrugore dhe hekurudhore 19 kilometra e gjatë, e përuruar në vitin 2018 nga Presidenti rus Vladimir Putin, është një simbol i aneksimit të gadishullit ukrainas të Krimesë nga Rusia në vitin 2014. Më 8 tetor 2022, një kamion i mbushur me eksplozivë që udhëtonte në urë shpërtheu, duke shkaktuar dëme të mëdha.
Shpërthimi masiv i vuri flakën tetë cisternave hekurudhore që transportonin produkte nafte dhe shkatërroi dy pjesë të një ure betoni rrugore. Pesë persona u vranë në sulm, përfshirë shoferin e kamionit që ishte ngarkuar pa dijeni me eksploziv, tha gjykata. Tetë personat të cilët kishin deklaruar se nuk ishin fajtorë, ishin në gjyq me dyer të mbyllura që nga shkurti.
Një sulm tjetër, për të cilin Kievi mori përsëri përgjegjësinë, shkaktoi gjithashtu dëme në urë, duke përdorur mjete ajrore pa pilot në korrik 2023. Që atëherë, autoritetet ruse e kanë forcuar shumë mbikëqyrjen e kësaj ure, e cila lejon kryesisht dërgimin e trupave dhe pajisjeve ushtarake në Krimenë e aneksuar.
