Xhakarta është tani qyteti më i madh në botë, sipas një raporti të ri të Kombeve të Bashkuara, me rreth 42 milionë banorë.
Raporti “Perspektivat e Urbanizimit Botëror 2025”, është përditësimi i parë që nga viti 2018, kur Tokio ishte qyteti më i madh në botë dhe Xhakarta renditej e 33-ta.
Sot, Tokio renditet i treti me 33 milionë banorë, ndërsa Daka në Bangladesh është e dyta me 40 milionë. I vetmi qytet jashtë Azisë që hyn në dhjetëshen e parë është Kajro në Egjipt.
Ajo që vlen të përmendet është se Daka pritet të bëhet qyteti më i madh në botë deri në mesin e shekullit, sipas OKB-së.
Nga ana tjetër, Tokio parashikohet të bjerë nga vendi i tretë në vitin 2025 në të shtatin në vitin 2050.
