Një stuhi e fuqishme dëbore ka shkaktuar kaos në New York City dhe në rajonin verilindor të Shteteve të Bashkuara, duke ndikuar ndjeshëm në qarkullimin ajror dhe lëvizjen e qytetarëve gjatë një prej fundjavave më të ngarkuara të vitit.
Autoritetet kanë shpallur gjendje emergjence në shtetet e New York-ut dhe New Jersey-t, ndërsa moti i keq ka krijuar vështirësi të mëdha për udhëtarët që po lëviznin për pushimet e Krishtlindjes.
Sipas shërbimit të monitorimit të fluturimeve, që nga mbrëmja e së premtes janë anuluar ose vonuar të paktën 9 mijë fluturime. Situata më problematike është regjistruar në aeroportet kryesore të zonës, përfshirë John F. Kennedy International, Newark Liberty International dhe LaGuardia.
Këto aeroporte kanë publikuar paralajmërime për borë në rrjetet sociale, duke njoftuar pasagjerët se kushtet e rënda atmosferike mund të shkaktojnë vonesa dhe anulime të tjera të fluturimeve edhe në orët në vijim.
Autoritetet u kanë bërë thirrje qytetarëve të shmangin udhëtimet e panevojshme dhe të ndjekin njoftimet zyrtare për sigurinë e tyre.
