Kryeministrja e Danimarkës, Mette Frederiksen, ka deklaruar se situata rreth Groenlandës pritet të mbetet e vështirë edhe në të ardhmen e afërt, duke paralajmëruar për sfida të reja përpara.
“Ishte e vështirë të përballohej presioni absolutisht i papranueshëm nga aleati ynë më i ngushtë, i cili ka vazhduar për një kohë të gjatë,” tha Frederiksen gjatë një konference për shtyp. Ajo shtoi se “ka shumë shenja se pjesa më e vështirë është ende përpara”.
Deklaratat e saj vijnë një ditë përpara një takimi në Uashington mes ministrit të Jashtëm danez, Lars Løkke Rasmussen, ministres së Jashtme të Groenlandës, Vivian Motzfeldt, dhe zëvendëspresidentit amerikan JD Vance, si dhe sekretarit të Shtetit Marco Rubio.
Presidenti amerikan Donald Trump ka përsëritur disa herë se Groenlanda duhet t’i bashkohet Shteteve të Bashkuara. Gjatë mandatit të tij të parë, ai propozoi blerjen e ishullit, ndërsa në mars të vitit 2025 deklaroi se ishte i bindur se Groenlanda mund të aneksohej. Edhe më herët, zëvendësshefi i Shtabit të Shtëpisë së Bardhë, Stephen Miller, ka vënë në pikëpyetje të drejtën e Danimarkës për të kontrolluar territorin, duke theksuar se Groenlanda duhet të jetë pjesë e SHBA-së.
Groenlanda është një territor autonom nën sovranitetin e Danimarkës. Në vitin 1951, Uashingtoni dhe Kopenhageni nënshkruan Traktatin e Mbrojtjes së Groenlandës, përveç angazhimeve të tyre në kuadër të NATO-s, sipas të cilit Shtetet e Bashkuara morën përgjegjësinë për mbrojtjen e ishullit nga çdo agresion i mundshëm.
