Reshjet masive të borës kanë goditur gadishullin Kamchatka në lindjen e largët të Rusisë, duke shënuar sasinë më të madhe të regjistruar në 30 vitet e fundit.
Në qytetin Petropavlovsk-Kamchatsky, grumbujt e borës kanë arritur deri në lartësinë e katit të katërt, ndërkohë që shumë banorë kanë humbur makinat e tyre, të mbuluara plotësisht nga bora. Në disa zona, shtëpitë janë izoluar pothuajse totalisht, duke u shkëputur nga qarkullimi.
Banorët vendas e kanë quajtur situatën një “apokalips bore”, pasi rrugët janë bllokuar, lëvizja është paralizuar dhe autoritetet kanë shpallur gjendjen e emergjencës. Edhe pse reshjet e dendura nuk janë të pazakonta për Kamchatkën, intensiteti i jashtëzakonshëm i stuhive të njëpasnjëshme e ka lënë qytetin kryesor të rajonit nën një bllokim të rëndë. Grumbujt e borës kanë arritur deri në 3 metra, madje edhe më shumë në zona të caktuara.
Si pasojë, shkollat janë mbyllur, ndërsa shumë biznese kanë kaluar në punë në distancë, për shkak të pamundësisë së lëvizjes dhe rrezikut për qytetarët. Pamjet që po qarkullojnë në rrjet tregojnë qartë përmasat e situatës ekstreme që ka përfshirë këtë zonë të Rusisë.
