Komisioni Qendror i Zgjedhjeve (KQZ) ka planifikuar që rezultatet përfundimtare të zgjedhjeve të parakohshme parlamentare të së dielës, 7 qershor, të shpallen më 26 qershor, ndërsa certifikimi i tyre të bëhet deri më 6 korrik. Megjithatë, këto data nuk janë fikse, pasi afatet mund të ndryshojnë në varësi të ankesave dhe ecurisë së procesit zgjedhor.
Procesi i numërimit të votave të kandidatëve për deputetë ka nisur në disa qendra komunale të numërimit dhe pritet të zgjerohet në të gjitha komunat. Sipas KQZ-së, ky numërim pritet të përfundojë brenda disa ditësh.
Paralelisht me të, po bëhet edhe verifikimi i votave për subjektet politike, ndërsa në vijim do të numërohen edhe votat me kusht, votat e personave me nevoja të veçanta dhe votat nga diaspora, përfshirë ato të ardhura me postë dhe ato të hedhura në përfaqësitë diplomatike.
Për votimin nga jashtë vendit, janë regjistruar mbi 104 mijë votues për postë, ndërsa mbi 27 mijë qytetarë kanë votuar në përfaqësitë diplomatike.
Numri përfundimtar i votave me postë do të përcaktohet pas verifikimit të zarfeve të mbërritura dhe kontrollit të listave zgjedhore për të shmangur raste të votimit të dyfishtë.
Sipas të dhënave paraprake, nga votimi me kusht dhe ai për persona me nevoja të veçanta janë evidentuar disa mijëra votues të regjistruar, të cilët do të përfshihen në procesin e numërimit pas verifikimeve përkatëse.
Rezultatet paraprake tregojnë se Lëvizja Vetëvendosje ka dalë e para me rreth 42.9% të votave, e ndjekur nga Partia Demokratike e Kosovës me rreth 21.1%, Lidhja Demokratike e Kosovës me rreth 17.6%, Aleanca për Ardhmërinë e Kosovës me rreth 7.2% dhe Lista Serbe me rreth 6.2%.
Këto zgjedhje u zhvilluan pas një periudhe politike të paqëndrueshme, duke qenë zgjedhjet e treta brenda pak më shumë se një viti e gjysmë, pas dështimit të legjislaturës së kaluar për të zgjedhur presidentin brenda afateve kushtetuese.
