Mbi 12 800 persona në ishullin Flores të Indonezisë nuk kanë mundur të kthehen në banesat e tyre pas tërmetit të fuqishëm me magnitudë 7.7, që goditi zonën të shtunën, 15 gusht.
Nga tërmeti kanë humbur jetën 53 persona dhe janë plagosur mbi 100 të tjerë.
Autoritetet thonë se nuk ka raportime për persona të zhdukur, ndërsa ekipet e kërkim-shpëtimit vijojnë kontrollet në zonat e prekura.
Shumë banorë kanë kaluar natën jashtë, në çadra të improvizuara, nga frika e shembjeve dhe pasgoditjeve të vazhdueshme. Qindra banesa janë dëmtuar rëndë, ndërsa janë prekur edhe shkolla, qendra shëndetësore dhe godina të tjera publike.
Banorët kanë kërkuar ndihmë për ushqime, ujë të pijshëm, ilaçe dhe çadra. Disa prej tyre thonë se janë larguar nga shtëpitë vetëm me rrobat që kishin veshur.
Forcat ajrore indoneziane kanë nisur dërgimin e rreth 13 tonëve ndihma, përfshirë ushqime, ujë të pijshëm, veshmbathje dhe pajisje mjekësore. Helikopterët po përdoren për të transportuar ndihma në komunitetet më të izoluara.
Tërmeti goditi pranë brigjeve veriore të Floresit dhe u shoqërua me qindra pasgoditje. Ishulli ka një histori të dhimbshme me tërmetet, pasi një lëkundje me të njëjtën magnitudë në vitin 1992 shkaktoi një cunami dhe rreth 2 500 viktima.
Indonezia ndodhet në të ashtuquajturën “Unaza e Zjarrit” e Paqësorit, një nga zonat më aktive sizmike në botë.
