Nga TikTok-u dhe Instagrami te skenat e ekzekutimeve para kamerave, personazhet online në Meksikë po bëhen gjithnjë e më shumë objektiva të luftës mes karteleve të drogës.
Ekspertët paralajmërojnë se rrjetet sociale janë kthyer në një fushë të re beteje për grupet kriminale.
Meksika po përballet me një fenomen gjithnjë e më shqetësues: influencuesit dhe personazhet e njohura në internet po kthehen në objektiva të dhunës së karteleve të drogës.
Në disa raste, vrasjet kanë ndodhur edhe gjatë transmetimeve live, përpara mijëra ndjekësve, duke i kthyer rrjetet sociale në skenën e një serie ekzekutimesh tronditëse.
Një nga rastet e fundit është ai i César Gastélum, 24 vjeç, i cili u qëllua për vdekje në Culiacán, kryeqytetin e shtetit Sinaloa, ndërsa po transmetonte drejtpërdrejt me miqtë e tij jashtë një restoranti.
Dy persona me motor iu afruan dhe njëri prej tyre hapi zjarr ndaj influencerit. Ngjarja zgjati vetëm pak sekonda, ndërsa kamera vazhdoi të regjistronte momentet e sulmit. Por rasti i Gastélum nuk është i izoluar.
Gjatë viteve të fundit, disa krijues përmbajtjeje në Meksikë janë vrarë në rrethana të ngjashme, duke ngritur shqetësime se përplasjet mes karteleve po përfshijnë edhe botën e influencerëve.
Një nga rastet që tronditi më shumë opinionin publik ishte ai i Valeria Márquez, 23 vjeç, një influencuese e njohur meksikane e bukurisë.
Ajo u qëllua për vdekje në vitin 2025 ndërsa po zhvillonte një transmetim live nga salloni i saj i bukurisë. Kamera vazhdoi të transmetonte momentet pas sulmit, duke e bërë ngjarjen një nga rastet më tronditëse të dhunës ndaj figurave të rrjeteve sociale në Meksikë.
Ekspertët thonë se influencerët janë përfshirë në një betejë të re propagande mes grupeve kriminale.
Disa prej tyre kanë publikuar përmbajtje që lidhen me simbole, muzikë apo stile jetese të asociuara me fraksione të caktuara kriminale. Për kartelet, këto shenja mund të interpretohen si mbështetje për një grup rival.
David Mora, analist i International Crisis Group, ka shpjeguar se vrasjet e influencerëve lidhen me përpjekjet e karteleve për të kontrolluar narrativën publike dhe për të dërguar mesazhe frike.
Sipas tij, rrjetet sociale janë kthyer në një territor të ri ku grupet kriminale luftojnë për ndikim dhe legjitimitet.
Të dhënat tregojnë një rritje të numrit të influencerëve të vrarë në Meksikë vitet e fundit.
Shumë prej rasteve janë regjistruar në Sinaloa, një nga zonat më të prekura nga lufta mes fraksioneve rivale të kartelit të Sinaloas.
Pas arrestimit të një prej figurave kryesore të kartelit, Ismael “El Mayo” Zambada, në rajon shpërthyen përplasje të ashpra për kontrollin e territorit dhe ndikimit kriminal.
Në këtë klimë dhune, disa figura publike në internet janë bërë pjesë e konfliktit, qoftë për shkak të lidhjeve të dyshuara, publikimeve të tyre apo perceptimit se mbështesin njërin krah.
Autoritetet meksikane po hetojnë nëse vrasjet e influencerëve janë urdhëruar nga kartelet si mënyrë për të eliminuar kundërshtarë ose për të dërguar mesazhe paralajmëruese.
Për shumë ekspertë, këto ekzekutime tregojnë një ndryshim në mënyrën se si grupet kriminale përdorin dhunën: jo vetëm për të eliminuar rivalët, por edhe për të ndikuar opinionin publik.
