Mes shumë ndërtesave të dëmtuara nga tërmeti i së martës, me një magnitudë 6.4 ballë, ishin edhe disa shkolla. Duke marrë shkas nga situata që po kalon vendi ynë, mësimi deri më tani në vendin tonë është pezulluar, si në arsimin parauniversitar dhe atë universitar.
Ministrja e Arsimit Besa Shahni gjatë fjalës së saj në mbledhjen e qeverisë tha se janë identifikuar të gjitha shkollat që kanë pësuar dëmtime në qarkun Tiranë, Durrës, Lezhë dhe jo vetëm. Po ashtu ajo tha se ministria ka dy opsione për kohën se kur do të nisë procesi mësimor.
“Ka nevoje per pak kohe per riparimin e shkollave, është identifikuar numri i atyre institucioneve që kanë pasur dëme. Më 26 nëntor drejtorët e shkollave apo dhe të drejtorive Arsimore kanë identifikuar numrin e shkollave e që kanë paraqitur ndonjë shqetësim. Më 27 nëntor inspektorët kanë bërë inspektime dhe më 28-29 inxhinierë nga Kosova kanë inspektuar shkolla, në Tiranë, Durrës Lezhë. Më 30 nëntor kemi bërë analizën mbi situatën në fjalë. Nuk mendoj se në qarkun Durrës është koha që të fillojmë të hënën. Edhe Tirana dhe Lezha kanë nevojë për disa rregullime. Kemi dy opsione për nisjen e procesit të shkollës:
E para, të fillojë mësimi në të gjitha qarqet e pa prekura dhe të bëjmë një shtyrje të fillimit të mësimit në zonat ku keni shpallur gjendjen e jashtëzakonshme.
Një opsion i dytë, është që vetëm në Durrës të mos fillojë mësimi, dhe në Qarqet Tiranë dhe Lezhë të mos fillojë në shkollat e dëmtuara, por ky nuk është një opsion i preferuar, pasi do të sillte çakordim të procesit mësimor. I takon qeverisë që të marrë një vendim në fund të kësaj mbledhjeje”, theksoi Shahini.
