Gjendja e dehur e drejtuesit të një automjeti është bërë shkak i një aksidenti të rëndë në orët e para të mëgjesit të sotëm në Fier, ku një person ka humbur jetën, ndërsa dy të tjerë kanë mbetur të plagosur.
Burime zyrtare nga Policia njoftojnë se aksidenti ka ndodhur rreth orës 02:30, në rrugën Fier-Roskovec, në vendin e quajtur “Kthesa e Verbasit”, ku shtetasi E.Ç, 26 vjeç, banues në Patos, duke drejtuar mjetin tip “Benz” në gjendje të dehur, ka dalë nga rruga dhe ka rënë në kanal.
Si pasojë ka gjetur vdekjen pasagjeri, shtetasi A.Sh, 52 vjeç, banues në Patos.
Gjithashtu kanë marrë dëmtime dhe ndodhen në Spitalin Rajonal Fier nën kujdesin e mjekëve drejtuesi i mjetit dhe pasagjeri tjetër, shtetasi M.Sh, 25 vjeç, banues në Patos.
Sipas policisë, nga testi i alkoolit, drejtuesi i mjetit rezultoi në gjendje të dehur në masën 1.08 mg/l.
Grupi hetimor po punon për sqarimin e plotë të rrethanave të kësaj ngjarjeje.
