Policia e Kavajës ka ndërmarrë një tjetër aksion në kuadër të planit operacional “Plazhi i lirë”, me fokus lirimin e hapësirave publike që zihen pa leje gjatë sezonit turistik.
Gjatë kontrolleve të zhvilluara në territorin e Golemit, në bashkëpunim me Policinë Bashkiake, u konstatuan disa hapësira në rrugë që ishin zënë dhe shfrytëzuar pa autorizim, për qëllime përfitimi.
Personat që kishin zënë këto ambiente i liruan ato me mirëkuptim, ndërsa strukturat e Drejtorisë Vendore të Policisë Durrës theksojnë se kontrollet do të vijojnë pa ndërprerje në të gjithë zonën bregdetare.
Njoftimi i plotë:
Kavajë
Zhvillohen kontrolle në zbatim të planit operacional të koduar “Plazhi i lirë”, me qëllim lirimin e hapësirave publike për pushuesit dhe verifikimin e aktiviteteve që kryejnë subjektet, gjatë sezonit veror.
Shërbimet e Komisariatit të Policisë Kavajë, në bashkëpunim me Policinë Bashkiake, në zbatim të planit operacional “Plazhi i lirë”, kanë ushtruar kontrolle në territorin e Golemit.
Nga kontrollet u konstatuan disa hapësira në rrugë, të cilat ishin përshtatur për ambiente me qëllim përfitimin, pa leje nga organet kompetente.
Qytetarët që i kishin zënë këto hapësira, i liruan ato, me mirëkuptim.
Drejtoria Vendore e Policisë Durrës do të vijojë kontrollet për të ndaluar çdo shkelje që cenon hapësirat publike dhe sigurinë e pushuesve. Ftojmë qytetarët të denoncojnë çdo rast paligjshmërie, në numrin 112.
