Interpol-i ka lëshuar urdhër arresti për ish-nënkryetarin e Listës Serbe, Milan Radoiçiç i cili dyshohet se është edhe organizator i sulmit të Banjskës më 24 shtator, ku u vra edhe polici i Kosovës, Afrim Bunjaku.
Muaj më parë, ministri i Punëve të Brendshme, Xhelal Sveçla ka publikuar video nga banesa dhe vila e Radoiçiç për të dhënë prova që udhëheqësi i grupit që kreu sulmin në Veri të Kosovës ishte Radoiçiç.
Ish-nënkryetari i Listës Serbe, gjithashtu është sanksionuar nga SHBA dhe Britania e Madhe.
Ndonëse Gjykata e Beogradit e liroi dhe e ndaloi të dilte nga territori i Serbisë e të shkojë në Kosovë pas ndalimit për sulmin në Banjskë, një padi për terrorizëm është depozituar ndaj Milan Radojicic dhe 30 personave të tjerë nga avokati serb Cedomir Stojkovic.
Ndërkohë Prokuroria e Lartë Publike në Beograd konfirmoi se do të apelojë vendimin e gjykatës që e liroi nga paraburgimi Radoiçiçin, i cili akuzohet për disa krime në lidhje me organizimin e grupit që shkaktoi agresion në Banjskë të Zveçanit më 24 shtator. Autoritetet serbe e akuzojnë për blerje të armatimeve me fuqi shkatërruese nga Tuzla në Bosnje dhe Hercegovinë, nga janari 2023 deri më 24 shtator kur ndodhi sulmi në Banjskë.
