Ambasada amerikane në Siri ka paralajmëruar qytetarët e saj për mundësinë e sulmeve të mundshme gjatë festës së Fitër Bajramit, që shënon fundin e muajit të shenjtë të Ramazanit. Sipas një njoftimi të postuar në faqen e internetit të ambasadës, ka një “mundësi të shtuar” për sulme që mund të synojnë ambasadat, organizatat ndërkombëtare dhe institucionet publike siriane në Damask.
“Metodat e sulmit mund të përfshijnë sulmues individualë, persona të armatosur ose përdorimin e pajisjeve shpërthyese,” theksohet në deklaratë.
Siguria në Siri mbetet e dobët pas rrëzimit të presidentit të saj afatgjatë Bashar al-Assad nga forcat e opozitës siriane të udhëhequra nga ekstremistët, duke pasuar një luftë civile që ka zgjatur për gati 14 vjet.
Në këtë kontekst, Uashingtoni ka këshilluar qytetarët e tij të mos udhëtojnë në Siri për shkak të “rreziqeve të rëndësishme të terrorizmit, trazirave civile, rrëmbimit, pengmarrjes, konfliktit të armatosur dhe ndalimit të padrejtë”. Po ashtu, veprimet e ambasadës janë pezulluar që nga viti 2012.
