Në samitin vjetor të gjashtë vendeve të Ballkanit Perëndimor dhe Bashkimit Evropian në Bruksel pati shumë fjalë miqësore, por ende nuk ka data specifike për pranimin e mundshëm të shteteve të reja.

Bashkimi Evropian, thekson radio gjermane Deutsche Welle, tashmë me 27 anëtarë ka përsëritur angazhimet për anëtarësimin e shteteve ballkanike që nga samiti i BE-së i vitit 2003 në Selanik.

Deri më tani, i vetmi shtet që ka bërë hapin e anëtarësimit në BE është Kroacia në vitin 2013. Gjashtë të tjerat, Serbia, Kosova, Mali i Zi, Maqedonia e Veriut, Bosnja dhe Hercegovina dhe Shqipëria janë të gjithë në faza të ndryshme të procesit të gjatë të anëtarësimit.

“Ne duhet ta përshpejtojmë këtë proces, me një ritëm krejtësisht të ri, në mënyrë që perspektiva e pranimit të shndërrohet në vetë pranim,” – tha kancelari gjerman Olaf Scholz në Bruksel.

Për sa i përket politikanëve të Ballkanit Perëndimor, Edi Rama, kryeministri i Shqipërisë, e cilësoi procesin e anëtarësimit si të padrejtë dhe neurotik. Ai tha se e sheh gjithashtu hipokrite që BE-ja po nxitohet të zgjerohet me Ukrainë dhe me Moldavinë përmes procesit për të vënë duke u nisur vetëm nga pikëpamja gjeopolitike.

Rama ka shpresa të mëdha tek përfaqësuesja e re e lartë të BE-së për Punët e Jashtme, Kaja Kallas. Ai është i bindur se ajo do të avokojë në emër të Ballkanit Perëndimor. Si një estoneze, shtoi Rama, Kallas u rrit nën një diktaturë komuniste në një vend që luftoi për lirinë dhe hyrjen në BE.

Në samitin e tij të fundit ballkanik, ish-presidenti i Këshillit Evropian Charles Michel foli për vitin 2030 si vitin që BE-ja mund të zgjerohet. Megjithatë, pasardhësi i tij, Antonio Costa, nuk ka përmendur ndonjë datë. Ndërkohë, diplomatët e BE-së kanë paralajmëruar se përpara se të ndërmerret ndonjë hap konkret, vetë Bashkimi Evropian duhet të përgatitet me reformat e brendshme

Ndoshta tema do të rishikohet në samitin e ardhshëm BE-Ballkani Perëndimor në Dhjetor 2025. Deri atëherë presidentja e Komisionit Europian Ursula von der Leyen ka njoftuar se do të paraqesë propozime konkrete për këtë çështje.