Ndërkombëtari shqiptar Enea Jorgji do të gjykojë një tjetër ndeshje të rëndësishme në Europë.
UEFA i ka besuar arbitrit elbasanas sfidën Ajax – Aston Villa, e vlefshme për fazën e 1/8-tave të Conference League.
Jorgji do të ketë asistentë Ridiger Çokaj dhe Denis Rexha, ndërkohë arbitër i katërt do të jetë Eldorjan Hamiti.
Ndeshja ndërmjet Ajax dhe Aston Villa do të zhvillohet ditën e enjte në stadiumin “Johan Cruyff Arena” duke filluar nga ora 18:45.
Në këtë sezon futbollistik, Enea Jorgji ka gjykuar 5 ndeshje në kompeticionet europiane për klube.
Në raudnin kualifikuese të Europa League gjykoi Union – Lugano, ku akordoi 4 kartona të verdhë, ndërsa më pas në fazën e grupeve të këtij kompeticioni vendosi drejtësi në sfidat Sporting – Raków 2-1 dhe Raków – Atalanta 0-4.
Gjithashtu ai gjykoi edhe në Conference League, në raundin me eliminim direkt takimin ndërmjet Molde dhe Legia Warszawa.
Ndërkohë në Champions League, ishte gjyqtar kryesor në ndeshjen Young Boys – Leipzig dhe hyri në histori duke u bërë arbitri i parë shqiptar që drejton një ndeshje të fazës së grupeve të kompeticionit prestigjoz për klube.
