Presidenti i Federatës Shqiptare të Futbollit është zgjedhur anëtar i Komitetit Ekzekutiv në UEFA në Kongresin e 43-të të UEFA-s i zhvilluar në Romë dhe që kishte në rendin e ditës zgjedhjen e Presidentit të UEFA-s dhe anëtarëve të Komitetit Ekzekutiv të UEFA-s, pozicion për të cilin kandidonte edhe Armand Duka.
Duka kandidonte kundër 8 kundërshtarëve për 7 vende në Komitetin Ekzekutiv dhe u rendit në vendin e 6-të në bazë të votave. Kreu i FSHF-së ka arritur të zgjidhet në Komitetin Ekzekutiv të UEFA-s me 36 vota, duke marrë besimin e delegatëve të shumë federatave të mëdha europiane për një mandat 4 vjeçar.
Një arritje shumë e madhe kjo për Shqipërinë dhe futbollin shqiptar që ka arritur të kalojë kufinjtë e përfaqësimit në institucionet më të rëndësishme europiane sportive. Për herë të parë në histori, futbolli shqiptar do të përfaqësohet nga Presidenti Duka në qeverinë e futbollit europian. Në këtë Kongres Aleksandër Ceferin u rizgjodh President i UEFA-s duke marrë një mandat për katër vitet në vazhdim.
