Policia ka dhënë një sqarim për mediat lidhur me arrestimin e Amant Josifit në Dubai. Josifi u arrestua me kërkesë të autoriteteve spanjolle dhe pritet ekstradimi i tij në Spanjë.
Policia në deklaratë thotë se shtetasi Josifi ishte shpallur në kërkim nga Gjykata e Shkallës së Parë në Spanjë për veprat penale “Mashtrime me rrethana rënduese”, “Krim Kibernetik”, “Skema Piramidale” dhe “Organizata Kriminale”.
Ai ishte pronar i disa Call-Center në Shqipëri, përmes të cilave mashtronte shumë qytetarë europianë që investonin në kriptovalutë.
Pas një kontrolli të Europol vitin e shkuar u arrestuan disa persona në Call-Centera, ndërsa vetë Josifi iku në Dubai.
Njoftimi i Policisë:
Sqarim i Policisë së Shtetit, në lidhje me kapjen në Dubai, të shtetasit A. J., të shpallur në kërkim ndërkombëtar në kuadër të megaoperacionit policor ndërkombëtar të koduar “FRIDA-REFOX”.
Në vijim të punës hetimore, gjurmuese dhe kërkimore, për kapjen e shtetasve të shpallur në kërkim në kuadër të hetimit të përbashkët ndërmjet autoriteteve policore shqiptare dhe atyre spanjolle, u kap në Dubai, për llogari të autoriteteve spanjolle, shtetasi i shpallur në kërkim ndërkombëtar A. J.
Ky shtetas ishte shpallur në kërkim ndërkombëtar, pasi Gjykata e Shkallës së Parë e La Seu de Urgell, Spanjë, me vendimin nr. 2, të datës 03.11.2022, i ka caktuar masën e sigurisë “Arrest në burg”, për veprat penale “Mashtrime me rrethana rënduese”, “Krim kibernetik”, “Skema piramidale” dhe “Organizata kriminale”, të parashikuara nga Kodi Penal spanjoll.
