Një 70-vjeçare nga Izraeli është arrestuar sot me akuzën e tentativës për të vrarë kryeministrin Benjamin Netanyahu duke përdorur një pajisje shpërthyese të improvizuar. Policia izraelite e përshkroi gruan si një protestuese të njohur antiqeveritare dhe tha se ajo kishte kontaktuar protestues të tjerë duke kërkuar mënyra për të siguruar armë dhe gjithashtu kishte ngritur pyetje në lidhje me sigurinë e kryeministrit.
Arrestimi i saj u krye nga Shin Bet (Agjencia e Sigurisë së Brendshme të Izraelit), ndërsa hetimi iu caktua Njësisë së Krimeve të Rënda dhe Ndërkombëtare të shërbimit kombëtar Lahav 433, me seli në Lod. Pas përfundimit të procedurës të mërkurën pasdite, autoritetet ia dorëzuan materialin Zyrës së Prokurorit Publik dhe Gjyqësorit për ndjekje penale.
Kanali shtetëror KAN raportoi se gruaja e arrestuar ishte ndaluar dy javë më parë, por më pas ishte liruar me kushte kufizuese, duke përfshirë ndalimin e hyrjes në ndërtesat qeveritare dhe detyrimin për të mos iu afruar kryeministrit.
