Për të përballuar fluksin e madh të turistëve që bllokojnë rrugët për një selfie para Sagrada Familia, autoritetet e Barcelonës kanë njoftuar ndërtimin e një zone të dedikuar fotografimi, me qëllim rregullimin e vizitave dhe lehtësimin e jetës së përditshme për banorët.
Zona e re, e quajtur “paradhoma”, do të shtrihet në një sipërfaqe prej 6200 metrash katrorë, midis fasadës lindore të bazilikës dhe sheshit Plaça Gaudí. Ajo do të shërbejë si një hapësirë ku turistët mund të bëjnë foto përpara hyrjes në kishën ikonike të projektuar nga Antoni Gaudí, pa penguar qarkullimin në zonën përreth.
Punimet do të nisin pas verës, ndërsa përfundimi i tyre është planifikuar për prillin e vitit 2026, në përvjetorin e 100-të të vdekjes së arkitektit Gaudí.
Ky projekt kushton 2.7 milionë euro dhe është pjesë e një plani më të gjerë prej 15.5 milionë eurosh, që ka për qëllim përmirësimin e infrastrukturës dhe menaxhimin më efikas të vizitorëve në zonën përreth Sagrada Familias.
Me rreth 4.7 milionë vizitorë në vit, Sagrada Familia është vendi i dytë më i vizituar në Spanjë, pas Alhambrës në Granada, ndërsa Barcelona mirëpret rreth 32 milionë turistë çdo vit. Për të përballuar këtë fluks, qyteti ka marrë masa të shumta për të frenuar mbiturizmin, përfshirë:
• Ndalimin e qirave afatshkurtra deri në vitin 2028,
• Kufizimin e anijeve të lundrimit që ankorohen në port.
Kryetari i Bashkisë së Barcelonës, Jaume Collboni, deklaroi se qyteti nuk duhet të kthehet në një park tematik, duke theksuar:
“Turizmi duhet t’i shërbejë modelit të qytetit, jo e kundërta.”
