Bashkimi Evropian ka dhënë dritën jeshile për Italinë që të transferojë emigrantë të paligjshëm në kampin e Gjadrit, ku ata do të mbahen në pritje të riatdhesimit pas refuzimit të kërkesës për azil. Zëdhënësi i BE-së për Çështjet e Brendshme, Markus Lammert, njoftoi se kjo do të bëhet në përputhje me ligjin kombëtar italian dhe atë evropian, duke sqaruar se nuk ka asnjë pengesë ligjore për këtë hap.
Lammert shtoi se do të monitorohet nga afër zbatimi i marrëveshjes mes Tiranës dhe Romës, veçanërisht pas ndryshimeve të bërë në destinacionin e kampit përmes një dekreti të qeverisë italiane. Ai theksoi se ligji kombëtar italian do të zbatohet për këtë qendër, siç ka ndodhur deri tani për kërkesat e azilit, dhe kjo është në përputhje me rregullat e Bashkimit Evropian.
Sa i përket qëndrimit të BE-së ndaj këtyre zgjidhjeve të cilësuara si “innovative”, Lammert theksoi se BE-ja është e gatshme t’i shqyrtojë ato, por gjithmonë duke respektuar të drejtat ndërkombëtare dhe të drejtat themelore.
Në lidhje me këtë marrëveshje, Kryeministrja italiane Giorgia Meloni e cilësoi modelin e Shqipërisë një sukses, duke thënë se ai po fiton gjithnjë e më shumë mbështetje. Ajo e cilësoi këtë model si një shembull të mirë që ka arritur të fitojë pranim ndërkombëtar, pas kritikave fillestare.
Ministri i Brendshëm shqiptar, i cili mori pjesë në samitin për Sigurinë Kufitare në Londër, theksoi rezultatet konkrete të operacioneve për të luftuar emigracionin e paligjshëm dhe punën e ekipeve të përbashkëta hetimore.
Ndërkohë, Gjykata Evropiane e Drejtësisë pritet të marrë një vendim për çështjen e ndalimit dhe mbajtjes së emigrantëve në kampin e Gjadrit, pasi ka pasur debate për cilësimin e vendeve të sigurta.
