DURRES – Në orën 18.30, në pallatin e sportit Ramazan Njala, përfundoi takimi i rradhës në basketboll për meshkuj ndërmjet Teutës dhe Flamurtarit. Teuta me një formacion të ri, ku shtyllë e ekipit mbetet veterani Oltion Garo nuk arriti të kalojë me sukses sfidën me Flamurtarin.

Ndryshe nga paraqitja në transfertën vlonjate, Teuta e nisi mirë, e vazhdoi kështu deri në periodën e tretë dhe zhgënjeu në periodën e katërt. Pavarësisht nga kjo, takimi ishte interesant, me mbresa dhe emocione. Rivaliteti dhe ekuilibri u vunë re që në prologun e dyluftimit, aq sa nuk mund të përcaktoje se ku anonte avantazhi.

Në sekondat e fundit të 10 minutave të para, Teuta arrin të krijojë avancë vetëm për 1 pikë. Të dy ekipet kanë në përbërje lojtarë vendas dhe nuk janë prirur drejt merkatos si elita e kampionatit. Kjo është edhe arsyeja që loja ishte në barazpeshë të plotë.

Perioda e dytë ishte binjake me të parën, veçse epërsia e lehtë kaloi në anën e Flamurtarit. Kapiteni Kaso e udhëhoqi me kurajo ekipin e tij, drejt avantazhit të merituar 17-15. Sfidantët kaluan në pushim pas pjesës së parë me këto shifra: 37-36 për udhëtuesit nga Vlora.

Perioda e tretë foli e tëra me gjuhën e ekipit vendas të Teutës. Fitorja 14-8 e përmbysi avantazhin e Flamurtarit. Garo kontrolloi mirë lartësinë e topave, por edhe u ngarkua dukshëm me gabime personale. Pas tri pjesëve Teuta 50 pikë dhe Flamurtari 45.

Por ky avantazh sfumohet dukshëm, përpara asaj që ndodhi. Largimi i Orion Garos për plotësim të pesë gabimeve personale, ndikoi dukshëm në ecurinë e periodës së katërt. Epërsia prej 5 pikësh u “shkri” shpejt dhe “busulla” orientonte rrugën drejt fitores vlonjate.

Djelmoshat e rinj të Teutës, nuk e kanë përvojën e nevojshme të menaxhojnë suksesin në fitore kaq të ngushta, duke i dhënë mundësi lojtarëve të “regjur” të Flamurtarit të shtojnë presionin, të pajisin lojën me qetësinë e duhur dhe të fitojnë tamam atëherë kur duhet 22-12. Mbledhja aritmetike e rezultatit të katër periodave dha këto shifra finale: Flamurtari 67 dhe Teuta 62.

TEUTA – FLAMURTARI   62-67

Rezultatet për çdo pjesë: 21-20, 15-17, 14-8, 12-22

FORMACIONET

TEUTA: Garo, Veselagu, Pasha, Berberi, Dodaj/ Sabahi, Isaku, Pergjoka, Balla, L. Shehu, E. Shehu, Domi. Trajner: S. Mëngjezi

FLAMURTARI: Kaso, Mino, Toska, Beko, Meminaj/Veizi, Kollovi, Vasjari, Sotiri, Aliaj. Trajner: V. Birçaj

GJYQTARË: G. Cici, E. Koçi