Besëlidhja ka fituar bindshëm kundër Teutës në kryendeshjen e javës së 19-të në Superligën e basketbollit të meshkujve. Lezhjanët triumfuan mbrëmjen e djeshme në Durrës me rezultatin 79-99 (15-20, 16-26, 24-31, 24-22).
Një ndeshje e kontrolluar nga fillimi e deri në fund nga Besëlidhja, që nuk e diskutoi për asnjë moment fitoren. Kështu, lezhjanët reagojnë pas humbjes që pësuan një javë më parë kundër Vllaznisë, e cila ishte e para pas 44 fitoreve radhazi për ekipin e Afrim Bilalit.
Me 19 pikë të realizuara, Bryan Bernard ishte shënuesi më i mirë për Besëlidhjen në sfidën ndaj Teutës. Ndërkohë, durrsakët vuajtën kontributin e ulët të pankinës, ndërsa nuk mjaftoi “tripleta” dyshifrore e Tiras Morton, autor i 21 pikëve, 13 kërcimeve dhe 10 asistimeve.
