Kryetari i Partisë Demokratike, Sali Berisha, gjatë prezantimit të programit të PD, hodhi akuza të forta ndaj qeverisë për shkatërrimin e mjedisit dhe veçoi Taulant Ballën si përgjegjës për dëmtimin masiv të pyjeve në disa zona të vendit.
“Sot dihet, po të shkosh nga Elbasani deri në Kolonjë, shikon kamionët me dru, të gjithë kanë targën Taulant Balla. A janë të gjitha të tij apo jo, nuk e di, por emri i tij del kudo, edhe në Kolonjë edhe në Librazhd. Këta po bëhen më shumë sesa milionerë duke shkatërruar pyjet e Shqipërisë”, tha Berisha.
Ish-kryeministri vuri në dukje se degradimi i sektorëve mjedisorë ka sjellë pasoja të mëdha, por ai premtoi se Partia Demokratike ka një plan të qartë për të ringritur standardet e mbrojtjes së natyrës, duke e konsideruar këtë si një prioritet kryesor të qeverisjes së saj të ardhshme.
“Projekti ynë synon standardet më të mira evropiane për mjedisin”
Berisha tha se PD synon të vendosë standarde evropiane në mbrojtjen e natyrës, për të siguruar një mjedis të pastër dhe të zhvilluar për qytetarët shqiptarë.
“Pyllëzimi real do të jetë një nga drejtimet qendrore. Ai do të gërshetohet me mbjelljen e drurëve frutorë, por nuk do të hiqet dorë nga mbjellja e drurëve të tjerë autoktonë, sipas zonave ku ata janë të përshtatshëm,” u shpreh ai.
Sipas Berishës, qeveria ka shkatërruar të gjithë infrastrukturën e mbrojtjes së pyjeve dhe kullotave, ndërsa Partia Demokratike do të ndërmarrë një rindërtim të plotë të institucioneve për menaxhimin e mjedisit, bazuar në praktikat më të mira evropiane.
“Rindërtimi i institucioneve mjedisore dhe funksionimi i tyre sipas standardeve evropiane do të jetë një nga angazhimet tona kryesore para shqiptarëve,” përfundoi ai.
