TIRANË,26 gusht 2013 -Duke botuar dhe disa foto me Nobelisten, kryeministri në detyrë, Sali Berisha kujton sot ditëlindjen e shqiptares, Nënë Tereza. Kjo ditë sipas Berishës, është një ditë mirënjohjeje ndaj asaj që u shenjtërua për së gjalli me titullin ‘Nënë e mbarë njerëzimit’. 

“Sot ditëlindja e shqiptares që na dha nder më shumë se kushdo tjetër! Që na deshte shumë dhe kur nuk e deshëm, Nobelistes Nënë Tereza! 
Të dashur miq, sot është ditëlindja e shqiptares më të famshme të të gjitha kohrave, gruas më të njohur të shekullit të saj, nobelistes, Gonxhe Bojaxhi, Nënë Tereza e Kalkutës. Kjo ditë, për ne shqiptaret dhe mbarë njerëzit e qytetëruar, është ditë mirënjohje ndaj asaj që u shenjtërua për së gjalli me titullin, Nënë e mbarë njerëzimit. 

Për Nënë Terezën, 25 prilli i viti 1993, siç do të shprehej ajo vet, ishte dita më e lumtur e jetës së saj, sepse ne së bashku pritëm në dheun tonë, Papën Gjon Pali i II në vizitën e tij të parë historike në Shqipëri dhe Ballkan. Nderim të madh Nënë Terezës, bijës së kombit tonë që si shqiptare na dha nder më shumë se kushdo tjetër dhe të urojmë që Papa Francesco të shpejtojë shenjtërimin e saj. Nënë Tereza u nda nga jeta shenjtore e mbarë njerëzimit! Sb”, shkruan Berisha në Facebook.