Në një tryezë të rrumbullakët organizuar nga Partia Demokratike (PD) në ditën e Bajramit, Sali Berisha premtoi se të rinjtë shqiptarë do të kenë një rol të rëndësishëm në rikthimin e ‘trurit’ në Shqipëri dhe do të angazhohen në administratën e ardhshme.
Kryetari i PD-së theksoi se lista e kandidatëve për zgjedhjet e ardhshme përfshin 58 persona nën moshën 40 vjeç, dhe se këta të rinj do të jenë pjesë integrale e qeverisjes së tij. Ai shtoi se nevoja për angazhimin e të rinjve është jetike për të ardhmen e vendit.
“Idea e kthimit të trurit, u diktua prej largimit të trurit. Ne u përballëm me një largim, një eksod të madh gjatë viteve të fundit. Këta të rinj do të jenë pjesë substanciale e administratës së ardhshme. Do të jenë pjesë substanciale e qeverisjes tonë dhe ne kemi shumë nevojë për kontributin e të rinjve. Ai kontribut është jetik”, tha Berisha.
Në fjalën e tij, Berisha i fajësoi socialistët për largimin e shqiptarëve nga vendi dhe u bëri thirrje të rinjve që të mbështesin PD-në në zgjedhjet e ardhshme, duke premtuar se me ardhjen e kësaj partie në pushtet do të hapet sërish platforma TikTok, e cila është bllokuar në Shqipëri.
Berisha tha:
“Vendimi i parë do të jetë hapja e TikTok sepse duke goditur këtë platformë për qëllime censure, të gjithë duhet ta dinë se çdo diktaturë fillon me censurën. Kur ti nuk duron atë që duron kundërshtari, atëherë ke një problem me veten”.
