Kryetari i Partisë Demokratike Sali Berisha ka denoncuar projektin “Smart City”. Gjatë deklaratës për mediat, Berisha e ka cilësuar atë si fund e krye projekt korruptiv dhe me çmime deri në 30 herë më të larta se tregu.
Sipas Berishës, pajisje si kamerat e trupit të policëve dhe kamerat rrugore parashikohen me kosto shumëfish më të shtrenjta se çmimet reale. Berisha tha se projekti në Shqipëri kushton rreth 157 milionë euro për më pak se 2 milionë banorë, ndërsa në Bengalore të Indisë ka kushtuar 67 milionë dollarë për 8 milionë banorë.
“Por ky projekt, i cili është i tëri vendosje e Shqipërisë, qytetarëve të saj në kontroll total, është njëkohësisht një projekt fund e krye korruptiv. Çmimet e ofruara për realizimin e këtij projekti janë nga 10 gjer në 30-fishin e çmimeve për këto aparatura në treg. Kështu, në qoftë se kamera e trupit të policit kushton në këtë projekt 15.700 euro, ajo blihet kudo me 1000- 1500 euro. Në rast se kamera e rrugës kushton 52 mijë euro, kjo kamerë blihet lirshëm me 2 mijë euro. Pra është 25 herë më e shtrenjtë se sa gjendet në treg. Kostot e projektit në tërësi rezultojnë, krahasuar me zbatimin e tyre në vendet e tjera, në proporcion të paktën 10-12 herë më të larta. Kështu në Bengalore të Indisë ky projekt ka kushtuar 67 milionë dollarë për një popullsi 8 milionë banorë, mbi katërfishin e popullsisë së Shqipërisë.
Pra, i bie rreth 15 herë më shtrenjtë projekti në Shsqipëri, po të kemi parasysh se këtu as 2 milionë banorë nuk janë dhe projekti kushton 157 milionë euro. Edhe këtu dora e zezë e kunatit famëzi me prestanome është e sigurt. Imagjinoni pra vjedhjet 15-fishi i kostos të një qyteti të famshëm në Indi. Dënoj me forcën më të madhe një projekt të tillë si një vjedhje të përmasave të papërmbajtura, si një dhunim dhe cenim i madh i sigurisë kombëtare të shqiptarëve, i privacisë së tyre. Ata tani nuk mund të shkojnë më tek njëri-tjetrit pa syrin e Ciklopit mbrapa dhe ky është Edi Rama. Sigurisht që PD do e ngrejë më forcën më të madhe këtë çështje edhe në institucionet ndërkombëtare pasi përbën një shkelje fondamentale të të drejtave të njeriut,” tha Berisha.
