“Luftë e hapur për hipotekën e partisë”.
Kështu e cilëson situatën në Partinë Demokratike deputeti socialist Petro Koçi duke theksuar se po bëhet kacafytje për pronën.
Në emisionin “Zona Zero”, tha se ish-kryeministri është i prirur të bëjë çdo gjë për të arritur qëllimin e tij. Koçi e akuzon Sali Berishën edhe për krime, të cilat sipas tij, “tashmë nuk mund t’i bëjë hapur sepse shteti është në një stad tjetër”.
“Berisha i bën të gjitha, por nuk bën dot atë që bënte në vitet 1990. Atëherë bënte edhe krime hapur, por tashmë nuk i bën dot. Sot Shqipëria është në një stad tjetër. Sali Berisha është një person i dhunës dhe për qëllimin justifikon çdo mjet. Tashmë nuk ka hapësirë veprimi. Mund të sulmojë edhe selinë e tij, ta marrë me forcë”, tha deputeti i PS.
Gjithsesi, Koçi nuk beson në një rikthim dominues në politikë të Sali Berishës. “Nuk mund të ndodhë më ajo që ndodhi pas vitit 1997”, tha Petro Koçi.
