Agjencia Ndërkombëtare e Energjisë Atomike (IAEA), mbikëqyrësi bërthamor i OKB-së, ka lëshuar një deklaratë ku thuhet se nuk ka pasur “asnjë rritje të niveleve të rrezatimit jashtë vendit” të raportuar pasi SHBA-të goditën tre centrale bërthamore në Iran.
“IAEA do të japë vlerësime të mëtejshme mbi situatën në Iran sapo të bëhen të disponueshme më shumë informacione”, thuhet në deklaratë.
SHBA-të kanë kryer sulme në tre objekte bërthamore në Iran, Natanz, Isfahan dhe Fordo, ky i fundit besohet të jetë objektivi më i vështirë dhe më i çmuar.
Në një fjalim televiziv drejtuar kombit, Trump e cilësoi operacionin si një “sukses spektakolar ushtarak”, duke e paralajmëruar Teheranin të bëjë shpejt paqe ose të përballet me sulme shumë më të mëdha.
SHBA-të thuhet se përdorën bomba të rënda për shkatërrimin e bunkerëve të hedhura nga bombarduesit strategjikë B-2 dhe raketat Tomahawk.
Media shtetërore e Iranit pranon se një pjesë e lokacionit Fordo u “shënjestrua nga sulmet armike”, por minimizoi shkallën e dëmit.
Teherani më parë paralajmëroi se do të synonte interesat amerikane në Lindjen e Mesme në hakmarrje për çdo sulm të SHBA-së – deri më tani ka qëlluar me raketa drejt Izraelit, me shpërthime të dëgjuara mbi Jerusalem.
Izraeli mirëpret përfshirjen e SHBA-së, me kryeministrin izraelit Benjamin Netanyahu që thotë se “vendimi i guximshëm” do të “ndryshojë rrjedhën e historisë”.
Në SHBA, pati një reagim të përzier nga ligjvënësit, afërsisht përgjatë vijave partiake – me republikanët që përgëzuan Trumpin dhe demokratët që paralajmëruan se Amerika po tërhiqet në një tjetër luftë “pa fund”.
