Në Melburn u zhvillua mëngjesin e sotëm gara e parë sezonale e Botërorit të Formula 1, fituar nga piloti finlandez i Mercedes, Valtteri Bottas. Një triumf disi suprizë ky i pilotit Bottas, që e nisi garën nga vendi i dytë.
Gjithsesi, finlandezi parakaloi shokun e tij të skuadërs Lewis Hamilton që në start, pozicione të cilat pilotët i ruajtën deri në fund. Në podium u ngjit edhe Max Verstappen me Red Bull, i treti.
Një garë për t’u harruar kjo për makinën Ferrari, pasi të dy pilotët e saj u renditën jashtë zonës së podiumit, në vendet 4-5, respektivisht me Sebastian Vettel dhe Charles Leclerc.
Por ajo që shqetëson më shumë është diferenca prej 30 sekondash që dy makinat “kokëkuqe” kishin karshi Mercedes në fundin e garës. Ferrari për asnjë moment nuk arriti të jetë i shpejtë dhe të duelojë për fitore, duke zhgënjyer.
Gara në përgjithësi ishte e mërzitshme, me pak parakalime dhe ku pilotët e kreut ruajtën pozicionet që pas startit të garës. Bottas bëri një garë të jashtëzakonshme, duke u shkëputur që në fillim, i pakapshëm edhe nga Hamilton.
Finlandezi realizoi edhe xhiron më të shpejtë të garës, duke marrë edhe 1 pikë më shumë në renditje.Në fundin e garës Hamilton u detyrua të ruhej nga sulmet e Verstappen, që u rendit i treti.
