Nga mjekët e lodhur duke parë pacientët që vdisnin, te të afërmit që humbën të dashurit e tyre, mijëra brazilianë kanë dalë vullnetarë për provat e vaksinave COVID në një nga vendet më të prekura në botë me shpresën që heroizmi i tyre i qetë do të shpëtojë jetë.
Vendi më i madh i Amerikës Latine është bërë një terren i madh testimi për vaksinat për shkak të shkallës së shpërthimit të virusit, i cili ka shkaktuar më shumë se 7.3 milion njerëz të infektuar dhe mbi 180,000 viktima
Denise Abranches, 47 vjeçe, koordinatore e stomatologjisë në një spital në Sao Paulo, ishte vullnetarja e parë jashtë Britanisë që mori vaksinën provë nga AstraZeneca Plc.
“Unë kam qenë dëshmitare e shumë vdekjeve të vetmuara këtu: pacientë që nuk mund të jepnin lamtumirë të afërmve të tyre; të afërmit që nuk mund të jepnin lamtumirë të dashurve të tyre. Kur erdhi prova e vaksinës, unë u bashkova menjëherë,” i tha ajo Reuters.
“Kjo përpjekje globale e vullnetarëve në kërkim të një vaksine do të mbahet mend dhe do të mbetet në histori,” tha ajo. “Gjest i dashurisë nga vullnetarët. Kështu do të doja të më mbanin mend”.
Përveç vaksinës AstraZeneca, Brazili ka organizuar gjithashtu prova për Johnson & Johnson, Pfizer Inc dhe partnerin e tij BioNTech dhe Sinovac Biotech Ltd. të Kinës.
