Dy persona i shpëtuan një atentati me armë zjarri këtë të enjte në qytetin e Beratit. Ngjarja ndodhi në lagjen “Donika Kastrioti”, në afërsi të spitalit dhe fatmirësisht nga të shtënat nuk ka persona të lënduar. Burime zyrtare të policisë bëjnë të ditur se kanë qenë vetë dy personat në fjalë, të cilët denoncuan ngjarjen. Sipas tyre, ata u qëlluan nga një makinë në lëvizje brenda së cilës ndodheshin 2 persona.
“Shtetasit A. M., dhe A. Dh, banues në Berat, kanë njoftuar Sallën Operative të Drejtorisë Vendore të Policisë Berat se dy persona që lëviznin me një automjet kanë qëlluar me armë zjarri në drejtim të tyre, në lagjen “Donika Kastrioti”, në afërsi të spitalit. Nga të shtënat nuk ka persona të lënduar”, – thuhet në njoftimin e policisë.
Po kjo e fundit thotë se ka mundur t’i identifikojë autorët e dyshuar të ngjarjes dhe po punon për kapjen e tyre.
“Pas marrjes së njoftimit shërbimet e Policisë dhe grupi hetimor kanë shkuar menjëherë në vendngjarje dhe si rezultat i reagimit të shpejtë dhe punës paraprake hetimore është bërë e mundur identifikimin i dy autorëve që kanë qëlluar me armë zjarri, por për arsye hetimi nuk mund të bëjmë me dije gjeneralitetet e tyre.
Shërbimet e Policisë kanë ngritur pika kontrolli në hyrje-dalje të qytetit dhe vijojnë kontrollin në zonë për kapjen e tyre. Grupi hetimor në drejtimin e Prokurorisë po punon për zbardhjen e rrethanave dhe dokumentimin ligjor të rastit”, – thotë më tej policia e Beratit në njoftimin e saj për mediat.
