Vijojnë daljet nga selia blu të deputetëve me radhë, që kërkojnë arrestimin e kryebashkiakut të Durrësit Vangjush Dako.
Sot ishte deputeti i Durrësit, Oerd Bylykbashi, që deklaroi se dosja 339 provon sipas tij, modelin e marrjes së pushtetit nga Edi Rama nëpërmjet shkëmbimit të pasurive publike te bandat për votat e blera apo grabitura nga këto banda.
DEKLARATA E OERD BYLYKBASHIT:
Partia Demokratike kërkon arrestimin dhe gjykimin pa vonesë të Vangjush Dakos.
Faktet e krimit elektoral të Vangjush Dakos, janë të qarta dhe për këtë krim, ai duhet të jetë në burg!
Përgjimet e dosjes 339 kanë faktuar se Vangjush Dako është në komunikim të vazhdueshëm me bandat para, gjatë dhe pas zgjedhjeve.
Janë pikërisht ato banda që sot po marrin tendera, licenca dhe leje ndërtimi në Durrës.
Dosja 339 provon modelin e marrjes se pushtetit nga Edi Rama nëpërmjet shkëmbimit të pasurive publike tek bandat, për votat e blera apo grabitura nga këto banda për llogari të tepsisë së Edi Ramës.
Vangjush Dako duhet të arrestohet pa vonesë. Çdo ditë në liri ai shkatërron prova dhe manipulon dëshmitarët, i ndihmuar plotësisht nga kryeministri i vendit Edi Rama.
Krimi elektoral ka bllokuar rotacionin demokratik dhe qeverisjen e shtetit të së drejtës.
Në Shqipëri nuk ka për të patur as drejtësi, as luftë kundër krimit dhe asnjë zhvillim normal pa u ndëshkuar krimi elektoral që mban në pushtet qeverinë ilegjitime të Edi Ramës!
