Policia italiane ka dhënë detaje të reja në lidhje me Dario Myftiun, 38 vjeçarin i cili u kap nga policia shqiptare në Durrës disa ditë më parë. Myftiu ishte një ndër më të kërkuarit në Itali, pasi është kapo i një bande shqiptare që furnizonte qytetin e Padovës me marihuanë, heroinë dhe kokainë.
Autoritetet italiane zbulojnë se Dario Myftiu, është tradhtuar nga shënimet e tij të shkruara me dorë mbi pakot e drogës ku shënonte sasinë dhe vlerën. Organizata e drejtuar nga Myftiu funksiononte me stilin e Camorra-s napoletane ku të afërmit u krijonin kushte të mira dhe u ofronin ndihmë për t’u arratisur në Shqipëri të dënuarve me arrest shtëpie.
Policia e Durrësit bëri me dije në kohën e arrestimit të Myftiut, se 38-vjeçari është vënë në pranga pas një urdhër-arresti të Gjykatës së Padovës më 6 korrik për trafik droge.
Ndërkohë, një ditë pas arrestimit të Myftiut në Durrës, policia italiane arrestoi 8 anëtarë të bandës së tij në Padova, të gjithë shqiptarë.
