Komediania e njohur Chelsea Handler ka shkaktuar reagime të forta me deklaratat e saj të fundit në emisionin “Jimmy Kimmel Live!”. Ajo pranoi se ka shpërndarë lëndë narkotike gjatë festës së Vanity Fair Oscar Party 2025, ku morën pjesë shumë yje të njohur të Hollywood-it.
“Më pëlqen t’u jap njerëzve drogë”, tha Handler gjatë intervistës, duke shtuar se ajo është një mbështetëse e madhe e mikro-dozimit, një praktikë që përfshin marrjen e dozave të vogla të substancave si psilocybin dhe LSD.
“Njerëzit kanë këtë stigmatizim rreth drogave, që më duket shumë i bezdisshëm. Drogat mund të ndihmojnë shumë njerëz. Në atë festë, po ua shpërndaja të gjithëve. Thashë: ‘Merreni këtë, do të kaloni një kohë të mirë’ dhe njerëzit më thanë: ‘OK’”, tregoi ajo.
Handler theksoi se nuk përdor droga të rënda si kokainën apo heroinën, por mbështet drogat natyrale që, sipas saj, mund të ndihmojnë në trajtimin e depresionit dhe përmirësimin e humorit. “Nuk po flas për doza të larta, por për 50 miligramë MDMA ose LSD, jo aq sa të kesh halucinacione, por sa për t’u ndjerë më mirë”, sqaroi ajo.
Gjatë mbrëmjes së Vanity Fair, Handler u pa në shoqërinë e yjeve si Paris Hilton, Rita Ora dhe Ralph Fiennes, por nuk zbuloi se cilët personazhe të famshëm mund të kenë marrë drogë prej saj. Festa madhështore kishte të pranishëm emra të mëdhenj si Kim Kardashian, Sydney Sweeney, Olivia Wilde dhe Julia Fox.
Nuk është hera e parë që komediania flet hapur për eksperimentimin e saj me substanca narkotike. Në një intervistë të mëparshme, ajo kishte pranuar se “ka provuar pothuajse çdo drogë, përveç heroinës dhe kristal metit”.
Deklaratat e saj kanë ngjallur debate, me shumë njerëz që kritikojnë qasjen e saj ndaj drogave dhe ndikimin që mund të ketë në publik. Megjithatë, Handler vazhdon të mbrojë qëndrimin e saj, duke theksuar se përdorimi i kontrolluar i disa substancave mund të ketë përfitime.
