Kur cirku vjen në qytet, më të gëzuarit janë fëmijët. Edhe këtë herë nuk kishte si ndodhte ndryshe.
Me qindra vogëlushë durrsakë ndoqën mbrëmë live performancat e trupës së Cirkut Kombëtar, duke i shoqëruar shpeshherë numrat me duartrokitje, por edhe duke iu bashkuar në skenë akrobatëve.
E sigurt ishte që të gjithë mezi kishin pritur të ndiqnin shfaqjen.
Trupa e Cirkut Kombëtar ka ndërmarrë një tur shfaqjesh, kryesisht në qytetet bregdetare për shkak të sezonit turistik rrëfen akrobatja e njohur Klaudia Duro. Për të, edhe pas 18 vitesh në skenë, puna në Cirkun Kombëtar vijon me të njëjtin pasion si ditën e parë.
Për shkak të vështirësive teknike në ambiente të hapura trupa e Cirkut nuk mund të performonte gjithë repertorin e saj, por kjo nuk ia zbehu magjinë mbrëmjes që shijuan vogëlushët e Durrësit.
Kjo është e disata herë që trupa e Cirkut Kombëtar vjen të performojë në Durrës në 2 vitet e fundit, por shfaqja e së mërkurës ishte përshtatur për ambiente të hapura, me numra akrobacie në tokë e jo në ajër.
M.B.
