Stefano Pioli është pranë largimit nga drejtimi i Al Nasr, duke u bërë i katërti trajner që largohet nga ekipi që kur Cristiano Ronaldo iu bashkua skuadrës saudite. Raportimet nga media italiane sugjerojnë se marrëdhënia mes Piolit dhe Ronaldos ka arritur në një pikë të papërballueshme, si pasojë e rezultateve të dobëta dhe performancës së lojës.
Në 5 ndeshjet e fundit të kampionatit, Al Nasr ka arritur vetëm dy fitore, duke u larguar nga pozitat e para. Kjo ka krijuar tensione të mëdha brenda klubit, ku Ronaldo, si figura më e rëndësishme, ka ndikim të madh. Situata përkeqësohet që dy javë më parë, kur Pioli vendosi të zëvendësonte Ronaldon, një vendim që shkaktoi një përplasje verbale mes tyre, dhe Ronaldo e la stërvitjen menjëherë.
Marrëdhënia e tensionuar po e shtyn Piolin drejt largimit, dhe mediat raportojnë se ai mund të kthehet në Itali, ku Roma dhe Juventusi janë të interesuara për të punësuar trajnerin italian.
